What is niHkAma bhakti?

शक्तय ऊचुः ।
कामासुरवधार्थाय भक्तियुक्ता गजाननम् ।
देवर्षयः प्रार्थयंतो निःकामाः कथमप्यहो ॥ १ ॥
आदिशक्तिरुवाच ।
अथो सकामनिःकाममार्गं वक्ष्यामि शक्तयः ।
शृणुध्वं भावसंयुक्ताः संशयच्छेदनाय तम् ॥ २ ॥
स्वदेहपोषणाद्यर्थं यशोर्थं भावसंयुताः ।
भजंते कामसंयुक्ता देवं जानीत तान्नरान् ॥ ३ ॥
स्वस्वधर्मप्रसिद्ध्यर्थं देवसेवार्थमेव ये ।
निःकामास्ते भजंते तं देवं भावसमन्विताः ॥ ४ ॥
निःकामिका कृता भक्तिर्देवेशैः शृणुत प्रियाः ।
तस्याश्चिह्नं प्रवक्ष्यामि भवती हितकाम्यया ॥ ५ ॥
सृष्टिस्थितिलयाद्यर्थं निर्मिता विधिमुख्यकाः ।
वयं तदेव सेवा ते खेलसि त्वं गजानन ॥ ६ ॥
हृदि स्थित्वा च सर्वेषां भोगांस्त्वं दोषवर्जितः ।
भुंक्षे तेन गणेशान सेवा ते देहपोषिका ॥ ७ ॥
तव प्रीत्यर्थमानंदात् प्रकुर्मः स्वस्वधर्मजाम् ।
क्रियां सृष्ट्यादिकां नाथ तदर्थं प्रार्थयामहे ॥ ८ ॥
अधुना दैत्यमुख्येन सेवा ते खंडिता परा ।
असमर्थांश्च तां कर्तुं रक्ष नः सेवनोत्सुकान् ॥ ९ ॥
एवं संप्रार्थितो देवैर्विकटो नात्र संशयः ।
देहभोगादिभावेषु यशः स्वप्य स्पृहात्मभिः ॥ १० ॥
स्वधर्मसंयुतैः सर्वैः स्वस्वव्यापारजा क्रिया ।
कर्तव्या ढुंढिप्रीत्यर्थं निःकामा सा मता किल ॥ ११ ॥